Patay na si Basilio.

Iniwan siyang mag-isa ni Sisa. Palibhasa, nasa tamang edad na daw ito para asikasuhin ang sarili. Pero tila lantang halaman na niya itong nadatnan sa bahay. Malamig na. Pumanaw sa uhaw.

Si Basilio ang piniling ampunin ni Sisa mula sa maraming kandidato. Pinangakuang aalagaan, palalakihin ng maayos. Kaso madalas lang niya itong iwan mag-isa.

Agad niyang nilapitan ang minsang tinuring na pinakamaganda sa lahat, sinupot, at hinulog sa trash bin ng condo, pinabanguhan ang naging pansamantalang himlayan dala ng kapabayaan.

“Marami pa naman akong maaampong pusa. Sabihin ko na lang naglayas si Basilio, tulad ni Crispin. Kunwari na lang na hinahanap ko sila.”